Mae Adroddiad Sefyllfa Byd Natur 2016 yn cydnabod y rhan bwysig mae ffermwyr yn cyfrannu tuag at gadwraeth, ond mae yna bwyslais camarweiniol ar rai ffactorau amgylcheddol, dywedodd Undeb Amaethwyr Cymru.

Wrth ymateb i’r adroddiad, dywedodd Cadeirydd Pwyllgor Defnydd Tir UAC Gavin Williams: “Er y byddem yn sicr ddim yn cytuno â rhai o'r honiadau a wnaed yn yr adroddiad Sefyllfa Byd Natur Cymru, rwy’n croesawu’r ffaith ei bod yn llawer mwy cytbwys nag adroddiad y DU o ran cydnabod y rôl gadarnhaol sydd gan ffermwyr yng nghadwraeth, a dilysrwydd y pryderon yr ydym wedi bod yn crybwyll ers degawdau."

Ymhlith y pryderon hynny yw’r ffaith bod tan-bori - weithiau o ganlyniad i reolau cynllun amaeth-amgylcheddol - yn cael effaith niweidiol ar lawer o rywogaethau a chynefinoedd, dywedodd Mr Williams.

"Mae'n galonogol bod 67 y cant o'r rhywogaethau sy’n cael blaenoriaeth ac yr aseswyd yn yr adroddiad yn cael eu dosbarthu fel sefydlog neu'n cynyddu mewn niferoedd. Fodd bynnag, ar gyfer y rhywogaethau hynny nad ydynt yn perfformio cystal, mae’n rhaid i ni ystyried beth yw’r cam nesaf.”

Dywedodd Mr Williams y dylid gwneud asesiad cywir o'r ffactorau sy'n dylanwadu ar ddirywiadau o'r fath.

"Mae’r adroddiadau Sefyllfa Byd Natur amrywiol ar draws y DU yn cydnabod bod ffactorau megis cynnydd mewn ysglyfaethwyr ymhlith adar a mamaliaid, a rhoi'r gorau i bori, llosgi a thorri, oll yn cael effaith negyddol ar rywogaethau a chynefinoedd.

"Mae yna gydnabyddiaeth gynyddol o'r difrod amgylcheddol mae dan-reolaeth a cholli arferion ffermio yn eu cael,  ac yn ei gael os ydym am weld ffermio’n mynd yn llai hyfyw yn ariannol, ac mae’r pryderon hyn yn dechrau cael eu hadlewyrchu mewn adroddiadau o’r math yma”.

Fodd bynnag, dywedodd Mr Williams bod yna rai yn parhau i fod yn barod i roi’r bai ar amaethyddiaeth pryd bynnag maent yn wynebu problemau, ac yn parhau i wadu’r gwirioneddau anghyfforddus megis y ffaith bod niferoedd cynyddol o ysglyfaethwyr yn gwledda ar rai o'n rhywogaethau sydd fwyaf mewn perygl.

"Mae angen i wleidyddion ac amgylcheddwyr i fod yn onest gyda nhw eu hunain a'r cyhoedd yn gyffredinol am ffactorau megis ysglyfaethu, neu fel arall maent mewn peryg o achosi difrod pellach i'r amgylchedd."

Mae ein hymgyrch Amaeth Am Byth yn pwysleisio’r ffaith bod ffermio yn bwysig i bopeth sydd gyda ni yma yng Nghymru, ac mae hynny’n cynnwys ein hamgylchedd a’r rhywogaethau sy’n gwneud Cymru’n le unigryw,” ychwanegodd.

Gydag ond pythefnos i fynd nes bydd Undeb Amaethwyr Cymru yn cynnal y Gynhadledd Amaeth Cymru, mae UAC yn atgoffa pawb sydd yn cymryd diddordeb mewn materion amaethyddol a’r cyfleoedd am dyfiant yng Nghymru wledig yn dilyn Brexit i sicrhau lle yn y Gynhadledd.

Cynhelir y gynhadledd ar Hydref 6, yng Nghanolfan yr Aelodau ar Faes y Sioe Frenhinol, Llanelwedd i ddechrau am 9.30yb.

Catrin Haf Jones, newyddiadurwraig ITV Cymru fydd yn cadeirio’r gynhadledd.

Yn ystod bore’r gynhadledd bydd yr Economydd, Gwleidydd ac aelod o Gr?p economyddion ‘Vote Leave’  Yr Athro Warwick Lightfoot yn siarad am “Gyfleoedd economaidd a’r peryglon o symud ymlaen?, Swyddog Gweithredol Datblygu’r Farchnad Allforio Hybu Cig Cymru Deanna Leven yn siarad am fasnach a marchnadoedd a bydd Steve Keyworth, Sylfaenydd a Chyfarwyddwr Environmental Systems, ymgynghoriaeth amgylcheddol ac amaethyddol yn siarad am GIS a thechnoleg synhwyro o bell ar gyfer rhaglenni amgylcheddol ac amaethyddol.

Yn ystod prynhawn y gynhadledd, bydd Dirprwy Brif Weithredwr RWAS ac Ysgolhaig Nuffield Aled Jones  yn son am “Gynaliadwyedd amaethyddiaeth drwy’r gymuned a digwyddiadau cymunedol”, Prif Swyddog AHDB (Y Bwrdd Datblygu Amaethyddiaeth a Garddwriaeth) Tom Hind yn cyflwyno’r pwnc “Beth yw’r cydbwysedd cywir ar gyfer trafodaethau masnach?” a bydd Comisiynydd Cenedlaethau’r Dyfodol, Llywodraeth Cymru Sophie Howe hefyd yn rhoi cyflwyniad.

Bydd trafodaeth banel yn dilyn pob sesiwn ac yn rhoi cyfle i’r gynulleidfa ofyn cwestiynau.

Dywedodd Llywydd UAC Glyn Roberts: “Rydym bellach yn y paratoadau diwethaf ar gyfer ein Cynhadledd Amaeth Cymru ac rydym yn edrych ymlaen at ymchwilio’r nifer o agweddau a chyfleoedd am dyfiant yn dilyn Brexit.

Mae’r siaradwyr sydd gyda ni yn arbenigwyr yn eu meysydd ac yn sicr o gynnig persbectif gwahanol a mewnwelediad i'r hyn sydd i ddod yn y dyfodol unwaith y byddwn yn gadael yr Undeb Ewropeaidd o ran ein heconomi, masnach, technoleg a’n cymunedau cymdeithasol.

“Os nad ydych wedi archebu eich lle yn y gynhadledd ac mae diddordeb gyda chi mewn #AmaethAmByth, rwy’n eich annog i wneud hynny cyn gynted ac sydd bosib ar ein gwefan www.fuw.org.uk/conference neu drwy ffonio ein prif swyddfa ar 01970 820280, gan fod llefydd ar sail y cyntaf i’r felin”.

Cynhaliodd cangen Ceredigion o Undeb Amaethwyr Cymru daith tractorau llwyddiannus iawn, 24 milltir o hyd, ar ddydd Sul Medi 18 gan godi £540 ar gyfer Sefydliad Prydeinig y Galon Cymru (BHF).

Cychwynodd y 27 tractor allan o Gwili Jones, Maesyfelin, Llanbed cyn mynd trwy Cwmann, a dros y mynyddoedd i Landdewi Brefi.  Yna aeth y daith dros ddyffryn Teifi tuag at Olmarch, gyda’r cymal diwethaf yn mynd trwy Llanycrwys a Silian.

Dywedodd Swyddog Gweithredol UAC Ceredigion Mared Rand Jones: “Rwy’n hynod o hapus gyda’r swm a lwyddwyd i godi gyda’n taith tractorau gyntaf un - mi wnaeth pawb fwynhau'r daith, ac felly o hyn, allwn ddatblygu digwyddiad blwyddyn nesaf i fod hyd yn oed yn fwy!

“Roedd hi’n hyfryd gweld cynifer o bobl yn ymuno gyda ni yn y frwydr yn erbyn clefyd y galon.  Mae’n achos werth chweil a gobeithio ein bod wedi llwyddo i godi ymwybyddiaeth o faint o broblem yw clefyd y galon ar draws Cymru a’r DU yn gyfan gwbl.

“Hoffwn ddiolch hefyd i’r holl fusnesau sydd wedi cyfrannu gwobrau ar gyfer y raffl ar y diwrnod, pawb a gymerodd rhan yn y daith tractorau ac sydd wedi cynorthwyo at lwyddiant y digwyddiad.

Gwahoddir disgyblion ysgolion cynradd Cymru i gymryd rhan mewn cystadleuaeth i gynllunio cerdyn Nadolig ar y thema #AmaethAmByth ar gyfer cystadleuaeth flynyddol Undeb Amaethwyr Cymru.

Mae UAC yn gofyn i blant rhwng 4 a 11 mlwydd oed i ddylunio golygfa Nadoligaidd yn dangos i ni pam bod #AmaethAmByth ar gyfer cardiau Nadolig a fydd yn cael eu gwerthu i godi arian ar gyfer elusen yr undeb Sefydliad y Galon Brydeinig Cymru.

Dywedodd Llywydd UAC Glyn Roberts: “Caiff y gystadleuaeth ei rannu’n ddau gategori - yr ymgeiswyr Cymraeg a’r ymgeiswyr Saesneg. Gall y plant ddefnyddio unrhyw gyfrwng i greu eu cardiau, er enghraifft creonau, pensiliau lliw, peniau blaen ffelt neu baent i dynnu’r llun, ac mae’n rhaid defnyddio dalen A4 o bapur.

“Yr unig amod yw bod yn rhaid iddo fod yn garden Nadolig sy’n dangos pam bod #AmaethAmByth.  Bu’r gystadleuaeth yn llwyddiant mawr y llynedd a gobeithio, y gallwn sicrhau cefnogaeth ein hysgolion cynradd ar draws Cymru unwaith eto eleni.”

Bydd enillydd pob categori yn derbyn tocyn anrheg gwerth £30 i’w hunain, pecyn o’r cardiau yn dangos eu dyluniad, mynediad un diwrnod am ddim i Ffair Aeaf 2016 er mwyn derbyn eu gwobrau a siec gwerth £50 ar gyfer eu hysgol.

Bydd y dyluniadau buddugol ynghyd a detholiad o’r cynigion arall yn cael eu harddangos ar stondin UAC yn ystod y Ffair Aeaf ar Dachwedd 28-29. Y dyddiad cau ar gyfer ceisiadau yw dydd Gwener Tachwedd 11.

Mae angen cynnwys enw, oedran, rhif dosbarth, enw’r ysgol a chyfeiriad cartref y disgybl a’i anfon naill ai i This email address is being protected from spambots. You need JavaScript enabled to view it., ei bostio neu ddosbarthu i UAC, Llys Amaeth, Plas Gogerddan, Aberystwyth, SY23 3BT, wedi eu nodi fel “Cystadleuaeth Ysgolion”.

Heddiw, mae Undeb Amaethwyr Cymru yn atgoffa’r rhai hynny sydd â diddordeb yn ffermio a materion gwledig i leisio’i barn drwy arolwg ar-lein yr Undeb.

Mae’r ffigyrau presennol yn awgrymu bod 43 y cant o’r rhai sydd eisoes wedi cymryd rhan yn teimlo’n gyffrous am ganlyniad y refferendwm, tra bod 51 y cant yn teimlo’n bryderus am yr hyn sy’n mynd i ddigwydd unwaith bydd y DU yn gadael yr Undeb Ewropeaidd.

Drwy’r arolwg o ffermydd Cymru, mae UAC yn anelu at geisio darganfod beth mae ffermwyr yng Nghymru am ei weld yn digwydd yn y dyfodol yn dilyn Refferendwm yr UE, a’i fwriad yw rhoi cyfle i bawb sy’n llenwi’r arolwg i gael cyfle i gynnig sylwadau ar rai o’r prif faterion sy’n berthnasol i’r mathau o bolisïau amaethyddol a fydd o fudd i Gymru wedi i’r DU adael yr Undeb Ewropeaidd.

Hefyd mae lle ar yr arolwg ar gyfer sylwadau unigol ar sut allai neu ddylai ffermio yng Nghymru a’n cymunedau gwledig newid mewn modd sy’n gwella ein cynaliadwyedd ariannol, amgylcheddol a diwylliannol.

Dywedodd Llywydd UAC Glyn Roberts: “Mae UAC am glywed wrth bob un ohonoch sy’n cydnabod bod #AmaethAmByth ac sydd am fod yn rhan o lunio ein dyfodol yma yng Nghymru.

Nawr yw’r amser i ddrafftio’r polisïau yr ydym am weld yn cael eu gweithredu unwaith y byddwn wedi gadael yr Undeb Ewropeaidd, ac mae eich barn chi ar y materion yma yn bwysig iawn i ni.  Felly, os nad ydych wedi cwblhau’r arolwg ar-lein eto, ewch ati a dywedwch wrth eich teulu, ffrindiau a chymdogion am wneud hefyd”.

Mae Undeb Amaethwyr Cymru yn atgoffa pob Aelod o’r Cynulliad y bydd lefelau presennol o TB yng Nghymru yn peryglu ein cytundebau masnach gydag Ewrop os na fydd yna newid yn y polisi.

Mae’r undeb yn croesawu’r galw’r yn y Cynulliad Cenedlaethol am ddadl i ddileu TB mewn gwartheg yng Nghymru ac ymhlith bywyd gwyllt, ond yn pwysleisio bod hi’n hollbwysig bod bob Aelod o’r Cynulliad yn cefnogi’r cynnig mewn ymgais i gyflawni newid effeithiol yn y lefelau o achosion o TB.

Dywedodd Llywydd UAC Glyn Roberts: “Rydym yn croesawu’r gefnogaeth i’r cynnig ond yn annog yr holl ACau arall i gefnogi’r ddadl hefyd.

“Mae’n rhaid i bob Aelod o'r Cynulliad gydnabod y bydd y broblem o TB yng Nghymru yn cael canlyniadau trychinebus ar drafodaethau masnach y dyfodol os na gaiff y clefyd ymhlith ein bywyd gwyllt sylw ar frys.

“Mae’r ddadl yn gyfle am gydweithrediad ymhlith y trawsbleidiau ar fater sy’n achosi goblygiadau emosiynol ac ariannol ar gyfer nifer o ffermwyr yng Nghymru ac rydym angen cefnogaeth y Cynulliad i gyd er mwyn sicrhau newid yn y polisi.”

Mae UAC yn parhau i bwysleisio bod y lefelau TB presennol yng Nghymru  yn fwy na beth sy’n dderbyniol gan wledydd arall yn yr UE pan fydd y DU tu allan i’r farchnad sengl ac mae’r undeb yn hynod o bryderus bod statws presennol y clefyd o bosib yn dipyn o sialens o ystyried y bwlch sy’n deillio ar ôl methiant y brechiadau.

Cafodd y cynnig ei wneud gan Aelod y Cynulliad Canolbarth a Gorllewin Cymru Plaid Cymru a Gweinidog cysgodol dros Ynni, Newid Hinsawdd a Materion Gwledig   Simon Thomas ac yn cael ei gefnogi gan AC dros Ogledd Cymru Ll?r Gruffydd, AC Canolbarth a Gorllewin Cymru Neil Hamilton a AC Preseli Penfro Paul Davies.