Taith dractor lwyddiannus gan Undeb Amaethwyr Cymru Sir Drefaldwyn
Cafodd Undeb Amaethwyr Cymru (FUW) Sir Drefaldwyn ddiwrnod gwych ddydd Sul, 5ed Hydref 2025, wrth gynnal taith dractor lwyddiannus a gododd dros £1,000 i’w rhannu rhwng Prostate Cymru a changen leol yr Undeb.
Daeth dros 20 o dractorau ynghyd â nifer o gerbydau 4x4 i gymryd rhan yn y daith, a ddechreuodd o Lwynybrain, Adfa. Dilynodd y cyfranogwyr lwybr prydferth drwy gefn gwlad Sir Drefaldwyn cyn dychwelyd am farbeciw, a drefnwyd yn garedig gan deulu’r Yeomans.
Daeth y digwyddiad â ffermwyr, selogion tractorau a chefnogwyr o bob cwr o’r sir ynghyd i godi arian hanfodol er mwyn cefnogi gwaith Prostate Cymru mewn ymwybyddiaeth, ymchwil, a gwasanaethau cymorth i ddynion a’u teuluoedd yr effeithir arnynt gan ganser y prostad.
Dywedodd Cadeirydd Undeb Amaethwyr Cymru Sir Drefaldwyn, Wyn Williams, fod y diwrnod yn llwyddiant mawr ac yn adlewyrchu’r ysbryd cymunedol cryf sydd mor nodweddiadol o’r ardal:
“Rydym wrth ein bodd gyda’r ymateb a’r haelioni a ddangoswyd gan bawb a gymerodd ran. Roedd gweld yr holl dractorau a cherbydau 4x4 wedi’u trefnu yn olygfa wych, ac mae codi arian ar gyfer achosion mor bwysig yn rhywbeth y gall y gymuned gyfan fod yn falch ohono.
Mae digwyddiadau fel hyn yn dangos yr hyn sydd orau yng nghefn gwlad Sir Drefaldwyn – pobl yn dod at ei gilydd i fwynhau diwrnod bendigedig ac i gefnogi eraill. Rydym yn ddiolchgar iawn i bawb a helpodd i wneud y diwrnod yn bosibl - yn enwedig teulu Yeomans am eu croeso, ac i Jonathan Rees o Graig Farm Organics a Nerys Astley am yr arlwyo rhagorol.”
Ychwanegodd y gwesteiwr, John Yeomans: “Ar ran Undeb Amaethwyr Cymru Sir Drefaldwyn, hoffwn ddiolch yn fawr i bawb a gymerodd ran yn ein taith dractor gyntaf. Gobeithiwn y bydd hon yn dod yn ddigwyddiad blynyddol yn y calendr lleol.
Fel y dywedodd ein cadeirydd, mae’n wych i ffermwyr ddod at ei gilydd i rannu profiadau, sgwrsio, a chodi arian ar gyfer achos mor haeddiannol â Prostate Cymru. Mae’n braf gwybod bod ein hymdrechion yn gwneud gwahaniaeth go iawn.”
