MATERION TIR COMIN
Credwn fel Undeb ei fod yn bwysig cofio fod hawliau comin - yn enwedig yr hawl i bori anifeiliaid - yn ffurfio rhan annatod o fywyd ffermio amaethwyr Cymru.

Cred UAC y dylid cryfhau gofynion y Ddeddf Cofrestiadau Comin er lles y gymuned amaethyddol. Yn arbennig, dylid sefydlu system dribiwnlys, o dan awdurdod y Comisiynwyr Tir Comin, er mwyn datrys anghydfodau ac i ymarfer yr hawliau dros ac yng nghyswllt tir comin. At hynny, dylai cymdeithasau'r cominwyr gael pwerau i ddiogelu a gwarchod eu defnydd o'r comins.

Bu camddealltwriaethau ynglyn â statws tir comin a arweiniodd at ymddygiad anghyfreithiol ar gomins. Mae'n bwysig bod y fath broblemau'n cael eu hwynebu er mwyn diogelu diddordebau ffermwyr a phorwyr.

COETIR
Cred UAC fod yna botensial sylweddol i ddefnyddio coetiroedd fel modd o gyflenwi gweithgareddau ffermio eraill. Ar hyn o bryd, mae Prydain yn mewnforio tua 85% o'r pren sydd ei hangen ar y wlad. Mae yna fwy o dir coediog yng Nghymru (12%) na'r cyfartaledd dros Brydain, ond y mae'r ffigwr hwn yn parhau'n isel o'i gymharu â chyfartaledd gwledydd eraill yr UE. Er y bu mymryn o gynnydd yn y nifer o goed a blannwyd, mae'n go anhebygol y bydd hyn yn effeithio ar fewnforion coed Prydain nac yn cynorthwyo i gynnal cymunedau mwyaf bregus Cymru.

Mae UAC yn galw ar y Llywodraeth i:

  • fabwysiadu strategaeth ranbarthol eglur ar gyfer sefydlu a datblygu coedwigoedd a choedlannau yng Nghymru;
  • gefnogi argymhelliad Grwp Arolygu yr Is-Ysgrifennydd Gwladol dros Gymru a gynhwysir yn "Y Ffordd Ymlaen i Goedwigaeth Cymru", sy'n galw am fwy o gysondeb rhwng cymorth amaethyddol a choedwigol er mwyn annog cyfuniad y ddau ddiwydiant;
  • gynyddu'r grantiau ar gyfer plannu ac ail-stocio coetiroedd; gynnal arolwg pellach ar y cymhellion blynyddol a ddarperir o dan Gynllun Cymhorthdal y Coetir (WGS) a Chynllun Premiwm y Coetir Fferm (FWPS), gyda'r bwriad o gynyddu lefel y taliadau blynyddol;
  • gadarnhau ei chefnogaeth i weithgareddau Coed Cymru a'r aildyfiant o goetiroedd fferm yng Nghymru.