DYFODOL Y CYNLLUN GLASTIR

01/04/2011 00:00

Y prif bwnc trafod ymysg ffermwyr y dyddiau hyn yw’r cyhoeddiad pwysig a gafwyd yr wythnos diwethaf ynglŷn â dyfodol y Cynllun Glastir. Bu llawer o sylw i’r pwnc yma yn ystod 2010, a chofiwn i Elin Jones, y Gweinidog Amaeth gyhoeddi ar y 23ain o Dachwedd y byddai yna adolygiad annibynnol o ‘Elfen Cymru Gyfan’ y cynllun yng ngwyneb y nifer siomedig a oedd wedi ymgeisio. Cofiwn maI ychydig o dan 3000 o geisiadau a gafwyd i mewn drwy Gymru, ac mae’n bwysig pwysleisio hefyd fod yna gwestiwn mawr wedi ei godi ynglŷn â dilysrwydd llawer ohonynt. Sefydlwyd y pwyllgor dan gadairyddiaeth Rees Roberts, y ffermwr o Lanraedr ym Mochnant, a bu raid i’r grwp weithio’n galed dros gyfnod byr i gael atebion. Mae’n cynnwys 69 o argymhellion i wella a symleiddio’r cynllun, a’i wneud yn fwy atyniadol i ffermwyr. Erbyn hyn cawsom ymateb Llywodraeth y Cynulliad i’r argymhellion gyda 48 o’r pwyntiau yn cael ei derbyn yn ddi amod, 11 yn cael ei derbyn yn rhannol a 10 o’r argymhellion yn cael eu gwrthod ond y bydd ystyriaeth iddynt yn y lefel uwch o’r cynllun.